O DOG do 15 de maio de 2025 publicou a ORDE do 28 de abril de 2025 pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostidos con fondos públicos para o curso escolar 2025/26

O prazo para presentar solicitudes iniciarase o día seguinte ao da publicación desta orde no Diario Oficial de Galicia e rematará o día 20 de xuño de 2025 (este incluído).

A solicitude presentarase utilizando o modelo ED330B (Anexo I e II) da orde, dispoñible en sede electrónica. www.edu.xunta.gal/fondolibros e na páxina web do colexio.

Poderán presentar solicitudes os pais, nais, titores ou representantes legais do alumnado matriculado en tódolos cursos de Educación Primaria e ESO.

As solicitudes poden presentarse tanto de xeito presencial como en sede electrónica, pero xa que corresponde ao colexio a tramitación das mesmas e para evitar dificultades e inconvenientes que poidan derivarse da presentación electrónica (exemplo: non finalización do proceso ou erros durante o mesmo), rogamos que se optan pola tramitación electrónica llo comuniquen ao centro a través de: contacto@mariainmaculadaverin.com para poder facer o seguimento da mesma axeitadamente.

A solicitude será única para todos os fillos que estean admitidos no mesmo centro docente e deberá estar asinada polo pai, nai, titor/a ou representante legal do alumnado, e a súa presentación implicará que acepta as bases da convocatoria, cumpre os requisitos esixidos nela e que son certos os datos indicados na solicitude; así mesmo, que se compromete a conservar en bo estado e a devolver ao finalizar o curso os libros de texto e o material reutilizable recibidos do fondo solidario ou adquiridos coa axuda para libros de texto. O prazo máximo para devolver os libros de texto será o 20 de xuño de 2025.

Xunto co ANEXO I e II cumprimentados e asinados deberán presentar a seguinte documentación:
• Copia do libro de familia onde figuren tódolos membros cumputables da unidade familiar.
• En caso de separación ou divorcio, ademais deberán achegar a sentenza xudicial e/ou convenio regulador onde conste a atribución da custodia do/a menor.
• Certificado acreditativo do grao de discapacidade, se fose o caso, recoñecido por un órgano que non pertenza á Xunta de Galicia.
• Documentación xustificativa de situación de Violencia de xénero.
• No caso de que o pai e a nai ou o titor e titores carezan de DNI e NIE deberán achegar Certificado de convivencia, volante de convivencia ou informe dos servizos sociais ou do órgano equivalente do concello onde resida a familia.